"ég held að við höfum nú bara gott af þessu...." ???

Íslendingar eru svoddan krútt...

Fáum þetta á hreint.

Ríkissjóður tryggði um 300.000 innistæður á bankareikningum í Englandi upp á marga milljarða án þess að spyrja þig um álit.

Bankarnir verða gjaldþrota og nú er verið að leysa út trygginguna sem var gefin fyrir lánunum... þig.

Hinn núverandi ríkisrekni landsbanki var að fá "lán" upp á 100.000.000 pund frá breska ríkinu, en það eru uþb 19.000.000.000 krónur... á vöxtum...

Að auki fáum við þessar fréttir: (af mbl.is)

"Samkvæmt heimildum Morgunblaðsins mun breska ríkið lána því íslenska allt að þrjá milljarða evra, 450 milljarða króna, til að það geti staðið við skuldbindingar sínar. Bretar munu síðan gera upp við þá sem áttu innistæður á reikningunum. Skrifað verður undir samning þess efnis á allra næstu dögum.

Árni Mathiesen fjármálaráðherra gekk á laugardag frá sams konar samkomulagi við hollensk stjórnvöld þar sem hollenska ríkið veitir Íslandi lán sem gæti numið 1,1 milljarði evra eða um 165 milljörðum króna."

Ofan á þetta virðist síðan koma lán frá einum alræmdustu arðræningjum heimsins, International monetary fund:

http://www.mbl.is/mm/frettir/innlent/2008/10/13/bida_nidurstadna_serfraedinga_imf/

og annars væri það lán upp á um 700.000.000.000 frá Rússum sem verið

Er ykkur farið að svima líka?

Þarf að minna á að hér búa 300.000 manns... þar með talið aldraðir sjúkir, öryrkjar, fatlaðir og börn...

http://www.mbl.is/mm/frettir/innlent/2008/10/13/astandid_verra_en_thjodargjaldthrot/

Þessa grein ættu flestir að kynna sér en þarna er úskýrt að skattar verði hækkaðar og öll útgjöld til velferðarkerfis verði skert til að greiða þessi erlendu lán. Og vegna þess að allir peningarnir fara út í stað þess að halda áfram að vera í umferð hér á landi er tapið í raun mun meira en þær tölur gefa til kynna.

Og hvað segir hinn almenni Íslendingur...?

"ég held við höfum bara gott af þessu..."

en sætt... já, vonandi að við förum að spá aðeins í hlutina sem skipta máli og auðvitað er ég sammála þessu ef merkingin er að við munum gera róttækar breytingar á því kerfi sem kaffærði okkur svona harkalega. En einhvernveginn finnst mér margir segja þetta sem afskaplega barnalegt viðhorf til mjög alvarlegs vandamáls.

Ég efast t.d. um að við myndum spyrja barn sem rótar í ruslagámum í rúanda hvort það væri ekki ánægt með að þurfa ekki að spá í allri þessari tilgangslausu efnishyggju...?

hinn hluturinn sem maður heyrir gjarnan er:

 "æi, þarftu að vera að tala um þetta núna"

já, því miður... vegna þess að þetta er að gerast núna!

ef það kæmi flóð á Íslandi er ég viss um að flestir Íslendingar myndu leyfa vatninu að safnast upp að mitti áður en þeir færu að spá í hvort það væri kannski kominn tími til að slökkva á sjónvarpinu og fara að spá í undankomuleið...

Í heimi þar sem peningar eru konungur eru hlutirnir fljótir að gerast fyrir þá sem tapa þeim... Það vita allir að fólk sem á milljónir er fljótt að enda á götunni þegar auðurinn breytist í mínus tölu.

Að sama skapi getur Ísland breyst í þriðja heims ríki, innviðum landsins rústað og auðlindir landsins seldar á slikk. Og ekki gleyma því að þú ert "auðlind" landsins.

Þið sáuð hvað þetta var fljótt að gerast, eins og hendi væri veifað var krónan hrunin, bankarnir keyptir af ríkinu og þjóðin orðin skuldug upp fyrir hausinn á jóa risa.

Og ef þið haldið að þetta gerist ekki því við séum "rík af auðlindum" þá þarf fólk að fara að lesa sér til. Þriðja heims ríki eru mörg hver vellauðug af auðlindum, en þjóðin þrælar við nýtingu þeirra og gróðin er hirtur af stórfyrirtækjum og restin fer í vexti...

Ekki misskilja þessi orð mín sem svartsýni. Ég er sannfærður um að þegar vitleysan blasir jafn harkalega við fari nógu margir að sjá í gegnum hana til að hægt sé að uppræta hana.

Hér er nóg af auðlindum og við þurfum að koma í veg fyrir að við gefum þær upp á bátinn fyrir þessar skuldir ef við viljum njóta góðs af þeim.

Þær raddir innan samfélagsins verða stöðugt háværari um að það þurfi að draga þá til ábyrgðar sem hana bera og láta þá sem söfnuðu þessum skuldum borga þær niður. Þá er talað um að frysta eignir þeirra auðmanna sem að útrásinni komu og nota þá til að greiða þessar skuldir niður, frekar en auðlindir okkar og skattpeninga hins almenna borgara.

Það finnst mér ekki bara skiljanleg krafa heldur í raun óskiljanlegt að einhverjum detti í hug að þetta mál eigi að vera leyst einhvernveginn öðruvísi.

Þeim mun sorglegra finnst mér að sjá hve lágt heyrist í þessum röddum í fjölmiðlum. Hví ættir þú og íslenska þjóðin að vera send í ræsið á meðan þeir sem tóku þessi lán sem við getum nú ekki borgað halda áfram að maka krókinn?

Við héldum fund á laugardaginn sem gekk framar vonum.

Markmiðið er að halda annan fund næsta laugardag þar sem haldið verður áfram á sömu braut, þeir sem ekki komust eru hvattir til að mæta til að taka þátt í umræðunni og hugsanlegum aðgerðum.

Ég vil þakka þeim sem þetta lásu, ég heiti Guðjón Heiðar Valgarðsson og vil taka það fram svo ekki verði um fyllst að þessi grein inniheldur mínar persónulegu vangaveltur um hvað er í gangi. Þetta á ekki að endurspegla "stefnu" þessa hóps eða gilda fyrir "skoðanir" allra sem vilja taka þátt í umræðunni.

Hugmyndin með þessum "samtökum" er að vera öðruvísi en önnur samtök að því leyti að við gerum ekki alltaf ráð fyrir að vera "samtaka" í skoðunum. Fjölbreyttar skoðanir komu fram á fundinum á laugardaginn  en allir höfðu sama grundvallarskilning á því að eitthvað væri að og grípa þyrfti til skipulagðra aðgerða.

Síðasta og hættulegasta hugsunin sem ég vil taka fyrir er sú "að það sé ekkert sem "við" getum gert"...

Fyrir þá sem segja og hugsa það hef ég aðeins tvö orð: "vitið" og "til."

Bíða niðurstaðna sérfræðinga IMF

Athugasemdir

[Villi Asgeirsson, 14.10.2008 kl. 20:46]

Ég er í öðru óvinalandinu, Hollandi, svo ég kemst ekki heldur. Láttu mig samt vita hvort ég geti gert eitthvað.

[Guðjón Heiðar Valgarðsson, 15.10.2008 kl. 01:14]

það er hópur á facebook undir nafninu "hvað er í gangi" til að byrja með getiði joinað það! þar verða fréttir um atburði og aðgerðir sem þið getið fylgst með :)